07
Nov

Ahly yo mu Misiri yatsinze REG WBBC amanota 93-69 yegukana Zone V yaberaga muri Zanzibar.

Uyu mukino wa nyuma wabaye ku wa Gatandatu, tariki ya 2 Ugushyingo 2024.

Aya makipe yombi yagiye muri uyu mukino yaramaze kubona itike yo kuzahagararira Akarere ka Gatanu mu Mikino Nyafurika ya Africa Women Basketball League.

Uyu mukino watangiye wegeranye cyane abarimo Nadine Mohamed na Destiney Philoxy batsindira amakipe yombi amanota menshi. Agace ka mbere karangiye, Al Ahly iyoboye umukino n’amanota 22 kuri 21 ya REG WBBC.

Igice cya mbere cyarangiye Al Ahly ikomeje kuyobora umukino n’amanota 39 kuri 38 ya REG WBBC.

Ikipe ya REG yasubiranye imbaraga mu gace ka gatatu, Philoxy akomeza kuyifasha gutsinda . Mu minota itanu ya mbere y’aka gace yari yashyizemo ikinyuranyo cy’amanota ane.

Ikipe yo mu Misiri yongeye gutsinda mu minota ya nyuma. Aka gace karangiye Al Ahly ikomeje kuyora umukino n’amanota 64 kuri 60 ya REG WBBC.

Al Ahly yagiye mu gace ka nyuma itangira gutsinda amanota menshi cyane. Aka gace REG yagakinnye nabi cyane kuko yagatsinzemo amanota 8 gusa kuri 29.

Umukino warangiye, Al Ahly yatsinze REG WBBC amanota 93-69 yegukana Zone V idatsinzwe. Amakipe yombi ni yo azahagararira aka karere mu mikino ya Africa Women Basketball League izabera muri Sénégal mu Ukuboza 2024.